koi jugnu koi dipak kiran ho ya sitara ho

koī jugnū koī dīpak kiran ho yā sitāra ho

safar meñ raat aa pahuñchī koī to ab hamārā ho

kisī ke ishq kā naġhma hamāre lab pe bhī gūñje

koī to naam le kar ab hamārā bhī pukārā ho

kisī ke haath aise hoñ jo mujh ko thaam sakte huuñ

mujhe har ek laġhzish par sadā jis kā sahārā ho

koī to sub.h aisī ho ki jab maiñ niiñd se jāgūñ

mirī pahlī nazar ko bas vahī chehra nazārā ho

kabhī sochā hai mumkin hai jise tum bevafā samjhe

vahī laḌkī zamāne meñ vafā kā isti.āra ho

tirī palkoñ kī chaukhaT se jo aañsū chun liyā maiñ ne

vo ik aañsū vahī jugnū mujhe har shai se pyārā ho

bhañvar paañv se uljhe haiñ magar dil kī talab ye hai

mire jīvan kī naav kā tirā sañgam kinārā ho

maiñ kachchī niiñd se jaagī na jaane aaj phir kaise

koī us paar se shāyad mujhe phir se pukārā ho

junūn-e-ishq meñ 'īmāñ' faqat itnā parakh lenā

jise jugnū samajhtī huuñ ḳhabar kyā vo sharārā ho

koi jugnu koi dipak kiran ho ya sitara ho

safar mein raat aa pahunchi koi to ab hamara ho

kisi ke ishq ka naghma hamare lab pe bhi gunje

koi to nam le kar ab hamara bhi pukara ho

kisi ke hath aise hon jo mujh ko tham sakte hun

mujhe har ek laghzish par sada jis ka sahaara ho

koi to subh aisi ho ki jab main nind se jagun

meri pahli nazar ko bas wahi chehra nazara ho

kabhi socha hai mumkin hai jise tum bewafa samjhe

wahi laDki zamane mein wafa ka istiara ho

teri palkon ki chaukhaT se jo aansu chun liya main ne

wo ek aansu wahi jugnu mujhe har shai se pyara ho

bhanwar panw se uljhe hain magar dil ki talab ye hai

mere jiwan ki naw ka tera sangam kinara ho

main kachchi nind se jagi na jaane aaj phir kaise

koi us par se shayad mujhe phir se pukara ho

junun-e-ishq mein 'iman' faqat itna parakh lena

jise jugnu samajhti hun KHabar kya wo sharara ho