koi junun koi sauda na sar mein rakkha jae

koī junūñ koī saudā na sar meñ rakkhā jaa.e

bas ek rizq kā manzar nazar meñ rakkhā jaa.e

havā bhī ho ga.ī mīsāq-e-tīragī meñ farīq

koī charāġh na ab rah-guzar meñ rakkhā jaa.e

usī ko baat na pahuñche jise pahuñchnī ho

ye iltizām bhī arz-e-hunar meñ rakkhā jaa.e

na jaane kaun se tarkash ke tiir kab chal jaa.eñ

nishān-e-mehr kamān-e-sipar meñ rakkhā jaa.e

vafā gumān hī Thahrī to kyā zarūr ki ab

lihāz-e-ham-safarī bhī safar meñ rakkhā jaa.e

har ik se pūchhte phirte haiñ tere ḳhāna-ba-dosh

azāb-e-dar-ba-darī kis ke ghar meñ rakkhā jaa.e

hameñ bhī āfiyat-e-jāñ kā hai ḳhayāl bahut

hameñ bhī halqa-e-nā-mo.atabar meñ rakkhā jaa.e

koi junun koi sauda na sar mein rakkha jae

bas ek rizq ka manzar nazar mein rakkha jae

hawa bhi ho gai misaq-e-tiragi mein fariq

koi charagh na ab rah-guzar mein rakkha jae

usi ko baat na pahunche jise pahunchni ho

ye iltizam bhi arz-e-hunar mein rakkha jae

na jaane kaun se tarkash ke tir kab chal jaen

nishan-e-mehr kaman-e-sipar mein rakkha jae

wafa guman hi Thahri to kya zarur ki ab

lihaz-e-ham-safari bhi safar mein rakkha jae

har ek se puchhte phirte hain tere KHana-ba-dosh

azab-e-dar-ba-dari kis ke ghar mein rakkha jae

hamein bhi aafiyat-e-jaan ka hai KHayal bahut

hamein bhi halqa-e-na-moatabar mein rakkha jae