koi kamar ko teri kuchh jo ho kamar to kahe

koī kamar ko tirī kuchh jo ho kamar to kahe

ki aadmī jo kahe baat soch kar to kahe

mirī haqīqat-e-pur-dard ko kabhī us se

ba-āh-o-nāla na kahve ba-chashm-e-tar to kahe

ye aarzū hai jahannam ko bhī ki ātish-e-ishq

mujhe na shola gar apnā kahe sharar to kahe

ba-qadr-e-māya nahīñ gar har ik kā rutba o naam

to haañ habāb ko dekheñ koī guhar to kahe

kahe jo kuchh mujhe nāseh nahīñ vo dīvāna

ki jāntā hai kahe kā ho kuchh asar to kahe

jal uTThe sham.a ke mānind qissa-ḳhvāñ kī zabāñ

hamārā qissa-e-pur-soz lahza bhar to kahe

sadā hai ḳhuuñ meñ bhī mansūr ke anal-haq kī

kahe agar koī tauhīd is qadar to kahe

majāl hai ki tire aage fitna dam maare

kahegā aur to kyā pahle al-hazar to kahe

bane balā se mirā murġh-e-nāma-bar bhañvrā

ki us ko dekh ke vo muñh se ḳhush-ḳhabar to kahe

har ek sher meñ mazmūn-e-girya hai mere

mirī tarah se koī 'zauq' sher-e-tar to kahe

koi kamar ko teri kuchh jo ho kamar to kahe

ki aadmi jo kahe baat soch kar to kahe

meri haqiqat-e-pur-dard ko kabhi us se

ba-ah-o-nala na kahwe ba-chashm-e-tar to kahe

ye aarzu hai jahannam ko bhi ki aatish-e-ishq

mujhe na shola gar apna kahe sharar to kahe

ba-qadr-e-maya nahin gar har ek ka rutba o nam

to han habab ko dekhen koi guhar to kahe

kahe jo kuchh mujhe naseh nahin wo diwana

ki jaanta hai kahe ka ho kuchh asar to kahe

jal uTThe shama ke manind qissa-KHwan ki zaban

hamara qissa-e-pur-soz lahza bhar to kahe

sada hai KHun mein bhi mansur ke anal-haq ki

kahe agar koi tauhid is qadar to kahe

majal hai ki tere aage fitna dam mare

kahega aur to kya pahle al-hazar to kahe

bane bala se mera murgh-e-nama-bar bhanwra

ki us ko dekh ke wo munh se KHush-KHabar to kahe

har ek sher mein mazmun-e-girya hai mere

meri tarah se koi 'zauq' sher-e-tar to kahe