koi kar sakta hai yaro jaisa maine kaam kiya

koī kar saktā hai yaaro jaisā maiñ ne kaam kiyā

yaar ke zimme dī kar nekī apne ta.iiñ bad-nām kiyā

āñkhoñ se sahlāyā kiyā maiñ talve us ke vaqt-e-ḳhvāb

itnī ḳhidmat dekh mirī ghar ġhair ke jā ārām kiyā

kaun sī shab be-nāla-o-zārī maiñ ne nahīñ kī us bin sub.h

kaun sā din be-rañj-o-musībat meñ na ro ro shaam kiyā

kuchh na chalā bas us pe azīzo apnī hī maiñ jaan pe khelā

āḳhir dard-e-hijr ne us ke merā kaam tamām kiyā

shab kahā maiñ ne us se mirā dil zulf kā terī banda hai

kyuuñ use tū ne qaidī-e-dām-e-sumbul-e-mushkīñ-fām kiyā

kaafī thā us kī bastagī ko to tār-e-kākul-e-rishta-e-zulf

kar ke asīr-e-halqa-e-gesū kyuuñ use be-ārām kiyā

chīñ-ba-jabīñ ho bolā duur ho tujh ko hai saudā dīvāne

chhūTne kā kyuuñ us ke tū ne dil meñ ḳhayāl-e-ḳhām kiyā

avval murġh rishta bapā sā thā pāband-e-tār-e-zulf

halqa-e-gesū meñ lā us ko āḳhir said-e-dām kiyā

aarzū yak bosa kī rakhtā dil meñ 'jahāñdār' ai pyāre

la.al-e-lab-e-shīrīñ se tum ne par na kabhū in.aam kiyā

koi kar sakta hai yaro jaisa main ne kaam kiya

yar ke zimme di kar neki apne tain bad-nam kiya

aankhon se sahlaya kiya main talwe us ke waqt-e-KHwab

itni KHidmat dekh meri ghar ghair ke ja aaram kiya

kaun si shab be-nala-o-zari main ne nahin ki us bin subh

kaun sa din be-ranj-o-musibat mein na ro ro sham kiya

kuchh na chala bas us pe azizo apni hi main jaan pe khela

aaKHir dard-e-hijr ne us ke mera kaam tamam kiya

shab kaha main ne us se mera dil zulf ka teri banda hai

kyun use tu ne qaidi-e-dam-e-sumbul-e-mushkin-fam kiya

kafi tha us ki bastagi ko to tar-e-kakul-e-rishta-e-zulf

kar ke asir-e-halqa-e-gesu kyun use be-aram kiya

chin-ba-jabin ho bola dur ho tujh ko hai sauda diwane

chhuTne ka kyun us ke tu ne dil mein KHayal-e-KHam kiya

awwal murgh rishta bapa sa tha paband-e-tar-e-zulf

halqa-e-gesu mein la us ko aaKHir said-e-dam kiya

aarzu yak bosa ki rakhta dil mein 'jahandar' ai pyare

lal-e-lab-e-shirin se tum ne par na kabhu inam kiya