koi KHushbu miTTi se aane lagi hai

koī ḳhushbū miTTī se aane lagī hai

zamīñ par vo būñdeñ girāne lagī hai

palaT aa.ī hai phir se sāvan kī bārish

kaḌī dhuup ghar se haTāne lagī hai

mohabbat mohabbat aqīdat aqīdat

ye naġhme suhāne sunāne lagī hai

kahāñ se nikal aa.e haiñ ye patañge

ye kis kis ko bārish jagāne lagī hai

mohalle meñ ḳhāmosh rahtī thī laḌkī

jahāñ saarā sar par uThāne lagī hai

dhanak se lapak kar vo milne lagī hai

gumāñ se bhī ab paar jaane lagī hai

tamāzat ġhamoñ kī jalātī bahut thī

mirī aag bārish bujhāne lagī hai

ye ġhaflat ke parde bhī dil se haTā de

duā lab pe mere ye aane lagī hai

'mahak' aañkh se Tapkā paanī bahut hai

nadāmat se aañsū bahāne lagī hai

koi KHushbu miTTi se aane lagi hai

zamin par wo bunden girane lagi hai

palaT aai hai phir se sawan ki barish

kaDi dhup ghar se haTane lagi hai

mohabbat mohabbat aqidat aqidat

ye naghme suhane sunane lagi hai

kahan se nikal aae hain ye patange

ye kis kis ko barish jagane lagi hai

mohalle mein KHamosh rahti thi laDki

jahan sara sar par uThane lagi hai

dhanak se lapak kar wo milne lagi hai

guman se bhi ab par jaane lagi hai

tamazat ghamon ki jalati bahut thi

meri aag barish bujhane lagi hai

ye ghaflat ke parde bhi dil se haTa de

dua lab pe mere ye aane lagi hai

'mahak' aankh se Tapka pani bahut hai

nadamat se aansu bahane lagi hai