koi KHushi koi rahat idhar nahin aai

koī ḳhushī koī rāhat idhar nahīñ aa.ī

maiñ muntazir hī rahā umr bhar nahīñ aa.ī

safar tamām huā rahguzar tamām huī

mirī talāsh kī manzil magar nahīñ aa.ī

mire nasīb ke sūraj ne ḳhud-kushī kar lī

so dar pe mere kabhī bhī sahar nahīñ aa.ī

tumhāre baad diyā bhī nahīñ jalā ghar meñ

tumhāre baad havā bhī idhar nahīñ aa.ī

vo ek aas ki puurī jise na honā thā

vo ik umiid kisī din jo bar nahīñ aa.ī

bichhaḌ ke mujh se na jaane kahāñ basā huuñ maiñ

bahut dinoñ se mirī kuchh ḳhabar nahīñ aa.ī

maiñ dhuup chuntā huā ḳhush bahut huuñ sahrā meñ

mirī balā se agar chhāñv idhar nahīñ aa.ī

na ab junūñ hai na dasht-e-junūñ zamāne meñ

so ab kahīñ mujhe vahshat nazar nahīñ aa.ī

vo jis ke aane kā tā-umr e'tibār rahā

so e'tibār rahā vo magar nahīñ aa.ī

samūd-o-ā'd yahāñ sar uThā.e haiñ kab se

vo ek chīḳh abhī tak magar nahīñ aa.ī

tumhāre baad koī tum sā phir nahīñ aaya

tumhārī baat kisī meñ umar nahīñ aa.ī

tavīl hotī ga.ī baat har ġhazal meñ mirī

ki baat karnī mujhe muḳhtasar nahīñ aa.ī

koi KHushi koi rahat idhar nahin aai

main muntazir hi raha umr bhar nahin aai

safar tamam hua rahguzar tamam hui

meri talash ki manzil magar nahin aai

mere nasib ke suraj ne KHud-kushi kar li

so dar pe mere kabhi bhi sahar nahin aai

tumhaare baad diya bhi nahin jala ghar mein

tumhaare baad hawa bhi idhar nahin aai

wo ek aas ki puri jise na hona tha

wo ek umid kisi din jo bar nahin aai

bichhaD ke mujh se na jaane kahan basa hun main

bahut dinon se meri kuchh KHabar nahin aai

main dhup chunta hua KHush bahut hun sahra mein

meri bala se agar chhanw idhar nahin aai

na ab junun hai na dasht-e-junun zamane mein

so ab kahin mujhe wahshat nazar nahin aai

wo jis ke aane ka ta-umr e'tibar raha

so e'tibar raha wo magar nahin aai

samud-o-a'd yahan sar uThae hain kab se

wo ek chiKH abhi tak magar nahin aai

tumhaare baad koi tum sa phir nahin aaya

tumhaari baat kisi mein umar nahin aai

tawil hoti gai baat har ghazal mein meri

ki baat karni mujhe muKHtasar nahin aai