koi KHwab hai na KHayal hai ye ajib surat-e-haal hai

koī ḳhvāb hai na ḳhayāl hai ye ajiib sūrat-e-hāl hai

vahī vahshat-e-mah-o-sāl hai ye ajiib sūrat-e-hāl hai

kabhī sochtī huuñ ki maiñ agar tujhe be-naqāb karūñ magar

zarā dostī kā ḳhayāl hai ye ajiib sūrat-e-hāl hai

jo dil-o-nazar se to duur hai koī mas.ala to zarūr hai

kahāñ dil ke shīshe meñ baal hai ye ajiib sūrat-e-hāl hai

koī shīshagar koī kūza-gar koī zaḳhm de koī chārāgar

koī tiir hai koī Dhaal hai ye ajiib sūrat-e-hāl hai

tirī be-ruḳhī kā gila kare tire haq meñ koī duā kare

koī faisla bhī muhāl hai ye ajiib sūrat-e-hāl hai

hue munqata.a sabhī rābte kahīñ gum hue sabhī rāste

na safar kā koī ma.aal hai ye ajiib sūrat-e-hāl hai

koi KHwab hai na KHayal hai ye ajib surat-e-haal hai

wahi wahshat-e-mah-o-sal hai ye ajib surat-e-haal hai

kabhi sochti hun ki main agar tujhe be-naqab karun magar

zara dosti ka KHayal hai ye ajib surat-e-haal hai

jo dil-o-nazar se to dur hai koi masala to zarur hai

kahan dil ke shishe mein baal hai ye ajib surat-e-haal hai

koi shishagar koi kuza-gar koi zaKHm de koi chaaragar

koi tir hai koi Dhaal hai ye ajib surat-e-haal hai

teri be-ruKHi ka gila kare tere haq mein koi dua kare

koi faisla bhi muhaal hai ye ajib surat-e-haal hai

hue munqata sabhi rabte kahin gum hue sabhi raste

na safar ka koi maal hai ye ajib surat-e-haal hai