koi kisi ki tarah hai koi kisi ki tarah

koī kisī kī tarah hai koī kisī kī tarah

bas ek aap kā jalva hai aap hī kī tarah

simaT ke ġham ke añdhere meñ log baiTh ga.e

magar hameñ to bikharnā thā raushnī kī tarah

ye mere ḳhvāb kī jannat ye chāñd kā āñgan

yahāñ to dhuup bhī lagtī hai chāñdnī kī tarah

nazar meñ shakl tirī sub.h-e-āftāb-e-azal

zabāñ pe naam tirā harf-e-āḳhirī kī tarah

ham un ḳhudāoñ se jhuk kar nahīñ milā karte

jo aadmī se na milte hoñ aadmī kī tarah

vo dard dushman-e-jāñ kaise ban gayā 'parvīn'

jise aziiz rakhā ham ne zindagī kī tarah

koi kisi ki tarah hai koi kisi ki tarah

bas ek aap ka jalwa hai aap hi ki tarah

simaT ke gham ke andhere mein log baiTh gae

magar hamein to bikharna tha raushni ki tarah

ye mere KHwab ki jannat ye chand ka aangan

yahan to dhup bhi lagti hai chandni ki tarah

nazar mein shakl teri subh-e-aftab-e-azal

zaban pe nam tera harf-e-aKHiri ki tarah

hum un KHudaon se jhuk kar nahin mila karte

jo aadmi se na milte hon aadmi ki tarah

wo dard dushman-e-jaan kaise ban gaya 'parwin'

jise aziz rakha hum ne zindagi ki tarah