koi kya jaane uske husn ki duniya kahan tak hai

koī kyā jaane us ke husn kī duniyā kahāñ tak hai

vahīñ tak dekh saktā hai nazar jis kī jahāñ tak hai

taḌaptā huuñ kisī kī yaad meñ aur ye samajhtā huuñ

ye bechainī mohabbat kī faqat umr-e-ravāñ tak hai

ḳhalish baḌhtī chalī jaatī hai har lahza nigāhoñ kī

ḳhudā jaane hamāre shauq kā aalam kahāñ tak hai

lagī hai aag siine meñ magar ye soch kar chup huuñ

bharam ahl-e-mohabbat kā faqat zabt-e-fuġhāñ tak hai

kahīñ aisā na ho us ko havā-e-ġham bujhā Daale

tumhāre ruḳh kī tābānī mire soz-e-nihāñ tak hai

na ghabrā.eñ chaman vaale naved-e-amn detā huuñ

rasā.ī bijliyoñ kī sirf mere āshiyāñ tak hai

vafā kī manziloñ se be-niyāzāna guzar 'shāriq'

tabī.at kī pareshānī ġham-e-sūd-o-ziyāñ tak hai

koi kya jaane us ke husn ki duniya kahan tak hai

wahin tak dekh sakta hai nazar jis ki jahan tak hai

taDapta hun kisi ki yaad mein aur ye samajhta hun

ye bechaini mohabbat ki faqat umr-e-rawan tak hai

KHalish baDhti chali jati hai har lahza nigahon ki

KHuda jaane hamare shauq ka aalam kahan tak hai

lagi hai aag sine mein magar ye soch kar chup hun

bharam ahl-e-mohabbat ka faqat zabt-e-fughan tak hai

kahin aisa na ho us ko hawa-e-gham bujha Dale

tumhaare ruKH ki tabani mere soz-e-nihan tak hai

na ghabraen chaman wale nawed-e-amn deta hun

rasai bijliyon ki sirf mere aashiyan tak hai

wafa ki manzilon se be-niyazana guzar 'shaariq'

tabiat ki pareshani gham-e-sud-o-ziyan tak hai