koi mare to mar Dale mujhe

koī maare to maar Daale mujhe

is ḳharābe se to nikāle mujhe

'izzat-e-nafs merī bach jaa.e

mujh ko āvāz de bulā le mujhe

justujū thī ki tere lab paḌhtā

tū paḌhātī rahī risāle mujhe

bas añdhere se dostī kar lī

jab Darāne lage ujāle mujhe

ye sitam hai mire ḳhulūs ke saath

kar ke mad.hosh phir sañbhāle mujhe

vo haqīqat-pasand laḌkī bhī

kar ga.ī ḳhvāb ke havāle mujhe

pur-sukūñ niiñd uḌ ga.ī hai mirī

ai mirī maañ gale lagā le mujhe

baap ke baa'd mushkileñ dekhīñ

zarre lagne lage himāle mujhe

kaun rad kar sakegā mere giit

tū jo ik baar gungunā le mujhe

har ghaḌī yaad aate haiñ 'ārif'

haa.e vo nain kaale kaale mujhe

koi mare to mar Dale mujhe

is KHarabe se to nikale mujhe

'izzat-e-nafs meri bach jae

mujh ko aawaz de bula le mujhe

justuju thi ki tere lab paDhta

tu paDhati rahi risale mujhe

bas andhere se dosti kar li

jab Darane lage ujale mujhe

ye sitam hai mere KHulus ke sath

kar ke madhosh phir sanbhaale mujhe

wo haqiqat-pasand laDki bhi

kar gai KHwab ke hawale mujhe

pur-sukun nind uD gai hai meri

ai meri man gale laga le mujhe

bap ke ba'd mushkilen dekhin

zarre lagne lage himale mujhe

kaun rad kar sakega mere git

tu jo ek bar gunguna le mujhe

har ghaDi yaad aate hain 'arif'

hae wo nain kale kale mujhe