koi mahrum-e-mohabbat na raha mere baad

koī mahrūm-e-mohabbat na rahā mere ba.ad

rañg laa.ī mirī tāsīr-e-duā mere ba.ad

aaj iisā kī tarah daar pe khīñche hai mujhe

mujh pe ro.egī ye maḳhlūq-e-ḳhudā mere ba.ad

mere miTne se hue goyā qafas se āzād

na rahā koī giraftār-e-balā mere ba.ad

aisī rūThī hai mashiyyat se tirī rabb-e-karīm

phir chaman meñ na ga.ī bād-e-sabā mere ba.ad

fātiha ke liye aayā thā vo hamrāh raqīb

ḳhuub dī us ne mohabbat kī sazā mere ba.ad

sub.h-dam aatī hai is soḳhta-sāmānī meñ

baaġh se nāla-e-bulbul kī sadā mere ba.ad

merī jānib se koī jā ke kahe majnūñ se

ḳhāk-e-sahrā-e-tamannā na uḌā mere ba.ad

us ne ahbāb se pūchhā hai mire ghar kā pata

yaad aayā use paimān-e-vafā mere ba.ad

vo jo likkhā thā kabhī ḳhūn-e-jigar se maiñ ne

miTtā jaatā hai vahī naqsh-e-vafā mere ba.ad

tujh pe ilzām-e-mohabbat na lagā de duniyā

aa ke turbat pe yuuñ aañsū na bahā mere ba.ad

rañj to ye hai 'muzaffar' ki vo paimān-shikan

lab pe laayā na kabhī harf-e-duā mere ba.ad

koi mahrum-e-mohabbat na raha mere baad

rang lai meri tasir-e-dua mere baad

aaj isa ki tarah dar pe khinche hai mujhe

mujh pe roegi ye maKHluq-e-KHuda mere baad

mere miTne se hue goya qafas se aazad

na raha koi giraftar-e-bala mere baad

aisi ruThi hai mashiyyat se teri rabb-e-karim

phir chaman mein na gai baad-e-saba mere baad

fatiha ke liye aaya tha wo hamrah raqib

KHub di us ne mohabbat ki saza mere baad

subh-dam aati hai is soKHta-samani mein

bagh se nala-e-bulbul ki sada mere baad

meri jaanib se koi ja ke kahe majnun se

KHak-e-sahra-e-tamanna na uDa mere baad

us ne ahbab se puchha hai mere ghar ka pata

yaad aaya use paiman-e-wafa mere baad

wo jo likkha tha kabhi KHun-e-jigar se main ne

miTta jata hai wahi naqsh-e-wafa mere baad

tujh pe ilzam-e-mohabbat na laga de duniya

aa ke turbat pe yun aansu na baha mere baad

ranj to ye hai 'muzaffar' ki wo paiman-shikan

lab pe laya na kabhi harf-e-dua mere baad