koi mahtab-e-digar hai mere andar tujh sa

koī mahtāb-e-digar hai mire andar tujh sā

so mirā dāġh-e-mohabbat hai munavvar tujh sā

niim ke peḌ se shahtūt kise miltā hai

sab kā hotā nahīñ ai jaan muqaddar tujh sā

maslahat-bīñ mire lashkar ke jiyāle saare

hausla laa.eñ kahāñ se dil-e-asġhar tujh sā

zahr piinā dur-e-nāyāb luTāte rahnā

zarf kab mujh ko mayassar hai samundar tujh sā

'ishq bartā hī nahīñ tū ne abhī tak 'sāqib'

tis pe dā'vā hai nahīñ koī suḳhan-var tujh sā

koi mahtab-e-digar hai mere andar tujh sa

so mera dagh-e-mohabbat hai munawwar tujh sa

nim ke peD se shahtut kise milta hai

sab ka hota nahin ai jaan muqaddar tujh sa

maslahat-bin mere lashkar ke jiyale sare

hausla laen kahan se dil-e-asghar tujh sa

zahr pina dur-e-nayab luTate rahna

zarf kab mujh ko mayassar hai samundar tujh sa

'ishq barta hi nahin tu ne abhi tak 'saqib'

tis pe da'wa hai nahin koi suKHan-war tujh sa