koi malal ab bhi aashkar ho to mazarat

koī malāl ab bhī āshkār ho to ma.azarat

nigāh aap se gila-guzār ho to ma.azarat

sar-e-mizha ajab ajab charāġh jal uTheñ agar

navāh-e-chashm jashn-e-nau-bahār ho to ma.azarat

ye naḳhl-e-be-numū jo barg-o-bār lā nahīñ sakā

ba-faiz-e-dast-e-ġhair shāḳh-sār ho to ma.azarat

shikastagī ke baa'd dil bhī dekhne kī chiiz hai

nazar paḌe pe aañkh sharmsār ho to ma.azarat

junūñ kī rau meñ ho rahī hai ik ke baa'd ik ġhazal

ye silsila abhī sitāra-vār ho to ma.azarat

ravāq-e-jāñ meñ nazd-e-shām ik diyā sā jal uThe

nigār-e-shab ke haath meñ sitār ho to ma.azarat

sipāh-e-ġham to dil ko rauñdte hue guzar chukī

muhīt manziloñ abhī ġhubār ho to ma.azarat

maiñ ḳhud se to hisāb-e-dostāñ kabhī nahīñ kiyā

ḳhudā-na-karda gar kabhī shumār ho to ma.azarat

faqīr kā to hāsil-e-hayāt hai yahī hunar

janāb ko matā.a-e-kam-ayār ho to ma.azarat

ba-yak-nigah maiñ ḳhusrav-e-ġhazal to ho nahīñ sakī

ye durd-e-mai ḳhumār-e-musta.ār ho to ma.azarat

koi malal ab bhi aashkar ho to mazarat

nigah aap se gila-guzar ho to mazarat

sar-e-mizha ajab ajab charagh jal uThen agar

nawah-e-chashm jashn-e-nau-bahaar ho to mazarat

ye naKHl-e-be-numu jo barg-o-bar la nahin saka

ba-faiz-e-dast-e-ghair shaKH-sar ho to mazarat

shikastagi ke ba'd dil bhi dekhne ki chiz hai

nazar paDe pe aankh sharmsar ho to mazarat

junun ki rau mein ho rahi hai ek ke ba'd ek ghazal

ye silsila abhi sitara-war ho to mazarat

rawaq-e-jaan mein nazd-e-sham ek diya sa jal uThe

nigar-e-shab ke hath mein sitar ho to mazarat

sipah-e-gham to dil ko raundte hue guzar chuki

muhit manzilon abhi ghubar ho to mazarat

main KHud se to hisab-e-dostan kabhi nahin kiya

KHuda-na-karda gar kabhi shumar ho to mazarat

faqir ka to hasil-e-hayat hai yahi hunar

janab ko mataa-e-kam-ayar ho to mazarat

ba-yak-nigah main KHusraw-e-ghazal to ho nahin saki

ye durd-e-mai KHumar-e-mustaar ho to mazarat