کوئی منظر ہو آنکھوں کو بہت اچھا دکھاتا ہے

کوئی منظر ہو آنکھوں کو بہت اچھا دکھاتا ہے

محبت میں یہ دل صحرا چمن جیسا دکھاتا ہے

بدلتا کچھ نہیں ہے عشق میں موسم گزرتے ہیں

ہمیں تو آئنہ اب تک وہی چہرہ دکھاتا ہے

کبھی باغ تمنا میں اک ایسا پھول کھلتا ہے

پرانے پیڑ پودوں کو جو پھر تازہ دکھاتا ہے

بھٹکنے کے لئے ہم خواب سے باہر نکلتے ہیں

کوئی آکر ہمیں پھر خواب کا رستہ دکھاتا ہے

تم ایسی موج میں ہو جو پلٹ کر آ نہیں سکتی

ہمیں گرداب اپنے پھیر میں کیا کیا دکھاتا ہے