koi maqam-e-sukun raste mein aaya nahin

koī maqām-e-sukūñ rāste meñ aayā nahīñ

hazār peḌ haiñ lekin kahīñ bhī saayā nahīñ

kise pukāre koī āhaToñ ke sahrā meñ

yahāñ kabhī koī chehra nazar to aayā nahīñ

bhaTak rahe haiñ abhī tak musāfirān-e-visāl

tire jamāl ne koī diyā jalāyā nahīñ

bikhar gayā hai ḳhalā meñ kiran karan ho kar

vo chāñd jo kisī pahlū meñ jagmagāyā nahīñ

taras ga.ī hai zamīñ bādaloñ kī sūrat ko

kisī nadī ne koī giit gungunāyā nahīñ

ujaḌ gayā thā kisī zalzale meñ shahr-e-vafā

na jaane phir use ham ne bhī kyuuñ basāyā nahīñ

'qatīl' kaise kaTegī ye dopahar ġham kī

mire nasīb meñ un gesuoñ kā saayā nahīñ

koi maqam-e-sukun raste mein aaya nahin

hazar peD hain lekin kahin bhi saya nahin

kise pukare koi aahaTon ke sahra mein

yahan kabhi koi chehra nazar to aaya nahin

bhaTak rahe hain abhi tak musafiran-e-visal

tere jamal ne koi diya jalaya nahin

bikhar gaya hai KHala mein kiran karan ho kar

wo chand jo kisi pahlu mein jagmagaya nahin

taras gai hai zamin baadalon ki surat ko

kisi nadi ne koi git gungunaya nahin

ujaD gaya tha kisi zalzale mein shahr-e-wafa

na jaane phir use hum ne bhi kyun basaya nahin

'qatil' kaise kaTegi ye dopahar gham ki

mere nasib mein un gesuon ka saya nahin