koi marta nahin kisi ke baghair

koī martā nahīñ kisī ke baġhair

zinda rahtā hai zindagī ke baġhair

zindagī ḳhush-gavār lagtī hai

bā'z-auqāt raushnī ke baġhair

har taraf sirf gahrā paanī hai

dariyā kyā shai hai jal-parī ke baġhair

jānñā aag se guzarnā hai

chain paḌtā hai āgahī ke baġhair

barq ke bin chamak rahā huuñ maiñ

yā'nī ḳhush-bāsh huuñ ḳhushī ke baġhair

shā'irī kyā hai bekalī ke sivā

bekalī kyā hai shā'irī ke baġhair

maiñ tumhāre baġhair aisā huuñ

jis tarah diin hai nabī ke baġhair

koi marta nahin kisi ke baghair

zinda rahta hai zindagi ke baghair

zindagi KHush-gawar lagti hai

ba'z-auqat raushni ke baghair

har taraf sirf gahra pani hai

dariya kya shai hai jal-pari ke baghair

jaanna aag se guzarna hai

chain paDta hai aagahi ke baghair

barq ke bin chamak raha hun main

ya'ni KHush-bash hun KHushi ke baghair

sha'iri kya hai bekali ke siwa

bekali kya hai sha'iri ke baghair

main tumhaare baghair aisa hun

jis tarah din hai nabi ke baghair