koi mauzu ho tera hawala achchha lagta hai

koī mauzū' ho terā havāla achchhā lagtā hai

phir us ke baa'd har chup rahne vaalā achchhā lagtā hai

ik aisī be-natīja jang laḌ kar aa rahā huuñ maiñ

ki ab shamshīr se baḌh kar piyāla achchhā lagtā hai

bahut ārā.ish-e-ḳhāna ke mansūbe banātā huuñ

magar kamre kī chhat par ek jaalā achchhā lagtā hai

mujhe achchhā nahīñ lagtā zabāñ ko band kar lenā

magar bachchoñ ke hāthoñ meñ nivāla achchhā lagtā hai

kabhī dil shaad rahtā hai kisī ke milte rahne se

kabhī koī bichhaḌ kar jaane vaalā achchhā lagtā hai

'anāsir se alag kar ke maiñ tujh ko dekhnā chāhūñ

tire hamrāh sab kuchh lā-muhāla achchhā lagtā hai

isī ik baat par hai ittifāq-o-iḳhtilāf us se

use ā.īna aur mujh ko piyāla achchhā lagtā hai

vo koī aur hai ham meñ se hargiz ho nahīñ saktā

jise is ghar se bāhar kā ujālā achchhā lagtā hai

koi mauzu' ho tera hawala achchha lagta hai

phir us ke ba'd har chup rahne wala achchha lagta hai

ek aisi be-natija jang laD kar aa raha hun main

ki ab shamshir se baDh kar piyala achchha lagta hai

bahut aaraish-e-KHana ke mansube banata hun

magar kamre ki chhat par ek jala achchha lagta hai

mujhe achchha nahin lagta zaban ko band kar lena

magar bachchon ke hathon mein niwala achchha lagta hai

kabhi dil shad rahta hai kisi ke milte rahne se

kabhi koi bichhaD kar jaane wala achchha lagta hai

'anasir se alag kar ke main tujh ko dekhna chahun

tere hamrah sab kuchh la-muhaala achchha lagta hai

isi ek baat par hai ittifaq-o-iKHtilaf us se

use aaina aur mujh ko piyala achchha lagta hai

wo koi aur hai hum mein se hargiz ho nahin sakta

jise is ghar se bahar ka ujala achchha lagta hai