koi model na koi ideal chahiye hai

koī model na koī ideal chāhiye hai

aaj bhī chāhiye tū hī mujhe kal chāhiye hai

qaid kar bāñhoñ meñ phir zulf ko zanjīr banā

ab koī kāT-kapaT aur na chhal chāhiye hai

merī ġhaflat hai tire husn-e-mujassam kā zavāl

mujh ko tanhā.ī meñ pur-nūr ḳhalal chāhiye hai

ek muddat se maiñ mahbūs huuñ apne andar

dam ghuTā jaatā hai kuchh radd-o-badal chāhiye hai

vaqt kā koī taqāzā nazar-andāz nahīñ

dil ba-zid hai use hairānī kā hal chāhiye hai

roTiyāñ señkne baiThe haiñ siyāsat vaale

un ko to barq-o-sharar raqs-e-ajal chāhiye hai

īstāda haiñ gulistāñ meñ bahā.im har sū

tā.iro ġhul karo ye nek amal chāhiye hai

in ko māhaul kī sangīnī kā ehsās nahīñ

jo ye kahte haiñ ki rangīn ġhazal chāhiye hai

izzat-e-nafs kā mushkil hai tahaffuz ya.anī

ek firqe ko yahāñ jang-o-jadal chāhiye hai

'sarfarāz' ab vahī haT-dharm qile kā ġhāsib

kah rahā hai ki use tāj-mahal chāhiye hai

koi model na koi ideal chahiye hai

aaj bhi chahiye tu hi mujhe kal chahiye hai

qaid kar banhon mein phir zulf ko zanjir bana

ab koi kaT-kapaT aur na chhal chahiye hai

meri ghaflat hai tere husn-e-mujassam ka zawal

mujh ko tanhai mein pur-nur KHalal chahiye hai

ek muddat se main mahbus hun apne andar

dam ghuTa jata hai kuchh radd-o-badal chahiye hai

waqt ka koi taqaza nazar-andaz nahin

dil ba-zid hai use hairani ka hal chahiye hai

roTiyan senkne baiThe hain siyasat wale

un ko to barq-o-sharar raqs-e-ajal chahiye hai

istada hain gulistan mein bahaim har su

tairo ghul karo ye nek amal chahiye hai

in ko mahaul ki sangini ka ehsas nahin

jo ye kahte hain ki rangin ghazal chahiye hai

izzat-e-nafs ka mushkil hai tahaffuz yani

ek firqe ko yahan jang-o-jadal chahiye hai

'sarfaraaz' ab wahi haT-dharm qile ka ghasib

kah raha hai ki use taj-mahal chahiye hai