koi monis nahin mera koi gham-KHwar nahin

koī monis nahīñ merā koī ġham-ḳhvār nahīñ

kyā maiñ itnī sī muravvat kā bhī haqdār nahīñ

mere hī dam se jinheñ azmat-e-kirdār milī

vahī kahte haiñ ki maiñ sāhab-e-kirdār nahīñ

ehtimām-e-rasan-o-dār hai ab kis ke liye

maiñ ḳhatāvār nahīñ aap ḳhatāvār nahīñ

munsif-e-shahr ko de kaun savāloñ ke javāb

ab kisī shaḳhs meñ bhī jur.at-e-guftār nahīñ

silsila ūñche makānoñ kā hai tā-hadd-e-nazar

shahr meñ phir bhī kahīñ sāya-e-dīvār nahīñ

qāfile vaale kahāñ pā.eñge manzil kā nishāñ

jazba-e-shauq nahīñ garmī-e-raftār nahīñ

kyā faqat daad hai shā.ir kī riyāzat kā sila

'soz' kyā mashq-e-suḳhan kāvish-e-bekār nahīñ

koi monis nahin mera koi gham-KHwar nahin

kya main itni si murawwat ka bhi haqdar nahin

mere hi dam se jinhen azmat-e-kirdar mili

wahi kahte hain ki main sahab-e-kirdar nahin

ehtimam-e-rasan-o-dar hai ab kis ke liye

main KHatawar nahin aap KHatawar nahin

munsif-e-shahr ko de kaun sawalon ke jawab

ab kisi shaKHs mein bhi jurat-e-guftar nahin

silsila unche makanon ka hai ta-hadd-e-nazar

shahr mein phir bhi kahin saya-e-diwar nahin

qafile wale kahan paenge manzil ka nishan

jazba-e-shauq nahin garmi-e-raftar nahin

kya faqat dad hai shair ki riyazat ka sila

'soz' kya mashq-e-suKHan kawish-e-bekar nahin