koi mujhko takta hai kanakhiyon ke pahlu mein

koī mujh ko taktā hai kanakhiyoñ ke pahlū meñ

chehra muskurātā hai hichkiyoñ ke pahlū meñ

hañstī muskurātī vo mujh ko taktī rahtī hai

chāñd jaisī ik laḌkī khiḌkiyoñ ke pahlū meñ

pyaar paltā hai aksar saḳht-dil ke konoñ meñ

bārisheñ barastī haiñ bijliyoñ ke pahlū meñ

haath chhoḌ jaane kā māh-e-ġham december hai

pat-jhaḌeñ taḌaptī haiñ sardiyoñ ke pahlū meñ

ghar ke māñjhe kī Dorī chhat patañg aur bachcha

ab kahāñ ye milte haiñ charkhiy.on ke pahlū meñ

apne biivī bachchoñ kī yaad meñ taḌapte haiñ

sarhadoñ pe faujī dil vardiyoñ ke pahlū meñ

lahlahāte jañgal kī khilkhilātī bārish thī

mor nāchte dekhe hirniyoñ ke pahlū meñ

vo hasīñ bahāroñ sī baaġh meñ jab aatī hai

phuul khilne lagte haiñ titliyoñ ke pahlū meñ

niiñd jab khulī 'ulfat' us kī yaad aa baiThī

karvaTeñ liiñ sāñsoñ ne garmiyoñ ke pahlū meñ

koi mujh ko takta hai kanakhiyon ke pahlu mein

chehra muskuraata hai hichkiyon ke pahlu mein

hansti muskuraati wo mujh ko takti rahti hai

chand jaisi ek laDki khiDkiyon ke pahlu mein

pyar palta hai aksar saKHt-dil ke konon mein

barishen barasti hain bijliyon ke pahlu mein

hath chhoD jaane ka mah-e-gham december hai

pat-jhaDen taDapti hain sardiyon ke pahlu mein

ghar ke manjhe ki Dori chhat patang aur bachcha

ab kahan ye milte hain charkhiyon ke pahlu mein

apne biwi bachchon ki yaad mein taDapte hain

sarhadon pe fauji dil wardiyon ke pahlu mein

lahlahate jangal ki khilkhilati barish thi

mor nachte dekhe hirniyon ke pahlu mein

wo hasin bahaaron si bagh mein jab aati hai

phul khilne lagte hain titliyon ke pahlu mein

nind jab khuli 'ulfat' us ki yaad aa baiThi

karwaTen lin sanson ne garmiyon ke pahlu mein