koi mujh sa mustahiqq-e-rahm-o-gham-KHwari nahin

koī mujh sā mustahiqq-e-rahm-o-ġham-ḳhvārī nahīñ

sau maraz haiñ aur ba-zāhir koī bīmārī nahīñ

har qadam par bāġh-e-ālam meñ bichhā hai dām-e-husn

kaun aisā hai jise zauq-e-giraftārī nahīñ

dekhe gar ġhaur se duniyā hai ġhaflat kā tilism

ye bhī ḳhvāb-e-ishq hai furqat se bedārī nahīñ

jaan le kar bhī jo haath aa.e to arzāñ jāniye

sahl aisī jins-e-ulfat kī ḳharīdārī nahīñ

'ishq kī nākāmiyoñ ne is qadar khīñchā hai tuul

mere ġham-ḳhvāroñ ko ab yārā-e-ġham-ḳhvārī nahīñ

mujh se zabt-e-dard-e-ulfat kī shikāyat hai fuzūl

ai dil-e-nādāñ tujhe ehsās-e-ḳhud-dārī nahīñ

merī daulat dekh kar kyuuñ tum ne ThanDī saañs lī

be-kasoñ par rasm-e-ā.īn-e-sitamgārī nahīñ

har taraf se ye sadā aatī hai mulk-e-husn meñ

ye vo duniyā hai jahāñ rasm-e-vafādārī nahīñ

ho gayā shāyad ki sarf-e-soz-e-ġham sab ḳhūn-e-dil

āñsuoñ kā ab vo dariyā aañkh se jaarī nahīñ

us ko rahm aa.e kahāñ ye nā-umīdī meñ umiid

dil ko ḳhush karnā hai shaġhl-e-girya-o-zārī nahīñ

ham haiñ chup baiThe hue lekin hai dil masrūf-e-ishq

is adīm-ul-fursatī kā naam bekārī nahīñ

band āñkhoñ se nazar aatī hai har shai dahr kī

ālam-e-rūyā meñ farq-e-ḳhvāb-o-bedārī nahīñ

koi mujh sa mustahiqq-e-rahm-o-gham-KHwari nahin

sau maraz hain aur ba-zahir koi bimari nahin

har qadam par bagh-e-alam mein bichha hai dam-e-husn

kaun aisa hai jise zauq-e-giraftari nahin

dekhe gar ghaur se duniya hai ghaflat ka tilism

ye bhi KHwab-e-ishq hai furqat se bedari nahin

jaan le kar bhi jo hath aae to arzan jaaniye

sahl aisi jins-e-ulfat ki KHaridari nahin

'ishq ki nakaamiyon ne is qadar khincha hai tul

mere gham-KHwaron ko ab yara-e-gham-KHwari nahin

mujh se zabt-e-dard-e-ulfat ki shikayat hai fuzul

ai dil-e-nadan tujhe ehsas-e-KHud-dari nahin

meri daulat dekh kar kyun tum ne ThanDi sans li

be-kason par rasm-e-ain-e-sitamgari nahin

har taraf se ye sada aati hai mulk-e-husn mein

ye wo duniya hai jahan rasm-e-wafadari nahin

ho gaya shayad ki sarf-e-soz-e-gham sab KHun-e-dil

aansuon ka ab wo dariya aankh se jari nahin

us ko rahm aae kahan ye na-umidi mein umid

dil ko KHush karna hai shaghl-e-girya-o-zari nahin

hum hain chup baiThe hue lekin hai dil masruf-e-ishq

is adim-ul-fursati ka nam bekari nahin

band aankhon se nazar aati hai har shai dahr ki

aalam-e-ruya mein farq-e-KHwab-o-bedari nahin