koi na ham-safar na koi rahnuma mila

koī na ham-safar na koī rahnumā milā

jis samt bhī gayā maiñ faqat naqsh-e-pā milā

asrār apnī zaat ke mujh par khule tamām

jab aap hī maiñ apne muqābil khaḌā milā

pūchhā jo sham' se to use chup sī lag ga.ī

badle meñ raushnī ke tujhe kyā sila milā

dekhā jo dil meñ jhāñk ke us ke nishāñ mile

ik aa.ine meñ aur bhī ik aa.ina milā

vo mujh se muḳhtalif thā maiñ us se thā muḳhtalif

phir us ke dil se kaise mirā dil ye jā milā

kuchh ḳhvāhisheñ thiiñ shauq the thoḌe se ḳhvāb the

kyā chāhiye thā ham ko magar kyā se kyā milā

shāyad ye zindagī ke hī sadmāt the ki jo

har shaḳhs apne aap se behad ḳhafā milā

koi na ham-safar na koi rahnuma mila

jis samt bhi gaya main faqat naqsh-e-pa mila

asrar apni zat ke mujh par khule tamam

jab aap hi main apne muqabil khaDa mila

puchha jo sham' se to use chup si lag gai

badle mein raushni ke tujhe kya sila mila

dekha jo dil mein jhank ke us ke nishan mile

ek aaine mein aur bhi ek aaina mila

wo mujh se muKHtalif tha main us se tha muKHtalif

phir us ke dil se kaise mera dil ye ja mila

kuchh KHwahishen thin shauq the thoDe se KHwab the

kya chahiye tha hum ko magar kya se kya mila

shayad ye zindagi ke hi sadmat the ki jo

har shaKHs apne aap se behad KHafa mila