کوئی نہ پوچھے نظرؔ وجہ سرکشی ہم سے

کوئی نہ پوچھے نظرؔ وجہ سرکشی ہم سے

زمانے بھر نے بہت کی ہے دل لگی ہم سے

عیاں ہے درد سمندر کا اونچی لہروں سے

چھپا نہ پائیں گے اشکوں کو وہ کبھی ہم سے

کرن کوئی مری راتوں میں آ گئی ہوگی

کچھ اور بڑھ گئی سورج کی بے رخی ہم سے

جہاں رکی تھی کبھی راہ زندگی آ کر

وہیں سے پائے گی اک موڑ زندگی ہم سے

گئے تھے ابر کرم بن کے جانب صحرا

کچھ اور بڑھ گئی صحرا کی تشنگی ہم سے

جو کل تلک ہمیں تاریک تر سمجھتے تھے

وہ آج آئے ہیں لینے کو روشنی ہم سے