koi na puchhe nazar wajh-e-sarkashi humse

koī na pūchhe 'nazar' vaj.h-e-sarkashī ham se

zamāne-bhar ne bahut kī hai dil-lagī ham se

ayaañ hai dard samandar kā ūñchī lahroñ se

chhupā na pā.eñge ashkoñ ko vo kabhī ham se

kiran koī mirī rātoñ meñ aa ga.ī hogī

kuchh aur baḌh ga.ī sūraj kī be-ruḳhī ham se

jahāñ rukī thī kabhī rāh-e-zindagī aa kar

vahīñ se pā.egī ik moḌ zindagī ham se

ga.e the abr-e-karam ban ke jānib-e-sahrā

kuchh aur baḌh ga.ī sahrā kī tishnagī ham se

jo kal talak hameñ tārīk-tar samajhte the

vo aaj aa.e haiñ lene ko raushnī ham se

koi na puchhe 'nazar' wajh-e-sarkashi hum se

zamane-bhar ne bahut ki hai dil-lagi hum se

ayan hai dard samandar ka unchi lahron se

chhupa na paenge ashkon ko wo kabhi hum se

kiran koi meri raaton mein aa gai hogi

kuchh aur baDh gai suraj ki be-ruKHi hum se

jahan ruki thi kabhi rah-e-zindagi aa kar

wahin se paegi ek moD zindagi hum se

gae the abr-e-karam ban ke jaanib-e-sahra

kuchh aur baDh gai sahra ki tishnagi hum se

jo kal talak hamein tarik-tar samajhte the

wo aaj aae hain lene ko raushni hum se