koi na-mehrban hai aur main hun

koī nā-mehrbāñ hai aur maiñ huuñ

hijāb-e-darmiyāñ hai aur maiñ huuñ

ġham-e-jaur-e-butāñ hai aur maiñ huuñ

ye ik koh-e-girāñ hai aur maiñ huuñ

ik āh-e-nā-tavāñ hai aur maiñ huuñ

mirī umr-e-ravāñ hai aur maiñ huuñ

idhar dil aur jigar meñ ik ḳhalish hai

udhar dard-e-nihāñ hai aur maiñ huuñ

ravāñ āñkhoñ se hai ashkoñ kā dariyā

ye bahr-e-bekarāñ hai aur maiñ huuñ

nafas hai aur gulshan kā tasavvur

ḳhayāl-e-āshiyāñ hai aur maiñ huuñ

namāz-e-ishq hai aur ye jabīñ hai

kisī kā āstāñ hai aur maiñ huuñ

hai merā tarjumān-e-ġham har aañsū

dahān-e-be-zabāñ hai aur maiñ huuñ

kisī kā qissa hai lab par shab-o-roz

kisī kī dāstāñ hai aur maiñ huuñ

kahūñ marqad meñ apnī bekasī kyā

ki ik tīra-makāñ hai aur maiñ huuñ

mirī hastī hai aur zarb-e-nafas hai

darā-e-kārvāñ hai aur maiñ huuñ

chaman hai aur mirī naġhma-sarā.ī

sabā hai bāġhbāñ hai aur maiñ huuñ

mirā har zaḳhm chhil kar rang laayā

bahār-e-be-ḳhizāñ hai aur maiñ huuñ

kisī kī yaad hai aur ḳhāna-e-dil

kisī kā mehmāñ hai aur maiñ huuñ

koī dam dard se ḳhālī nahīñ hai

jafā-e-āsmāñ hai aur maiñ huuñ

bahār aatī nahīñ mere chaman meñ

sadā daur-e-ḳhizāñ hai aur maiñ huuñ

idhar saaqī udhar dīdār-e-ḳhum hai

dar-e-pīr-e-muġhāñ hai aur maiñ huuñ

pata manzil kā kuchh miltā nahīñ hai

talāsh-e-kārvāñ hai aur maiñ huuñ

kahūñ ai 'sabr' apnā mashġhala kyā

ye ik urdu zabāñ hai aur maiñ huuñ

koi na-mehrban hai aur main hun

hijab-e-darmiyan hai aur main hun

gham-e-jaur-e-butan hai aur main hun

ye ek koh-e-giran hai aur main hun

ek aah-e-na-tawan hai aur main hun

meri umr-e-rawan hai aur main hun

idhar dil aur jigar mein ek KHalish hai

udhar dard-e-nihan hai aur main hun

rawan aankhon se hai ashkon ka dariya

ye bahr-e-bekaran hai aur main hun

nafas hai aur gulshan ka tasawwur

KHayal-e-ashiyan hai aur main hun

namaz-e-ishq hai aur ye jabin hai

kisi ka aastan hai aur main hun

hai mera tarjuman-e-gham har aansu

dahan-e-be-zaban hai aur main hun

kisi ka qissa hai lab par shab-o-roz

kisi ki dastan hai aur main hun

kahun marqad mein apni bekasi kya

ki ek tira-makan hai aur main hun

meri hasti hai aur zarb-e-nafas hai

dara-e-karwan hai aur main hun

chaman hai aur meri naghma-sarai

saba hai baghban hai aur main hun

mera har zaKHm chhil kar rang laya

bahaar-e-be-KHizan hai aur main hun

kisi ki yaad hai aur KHana-e-dil

kisi ka mehman hai aur main hun

koi dam dard se KHali nahin hai

jafa-e-asman hai aur main hun

bahaar aati nahin mere chaman mein

sada daur-e-KHizan hai aur main hun

idhar saqi udhar didar-e-KHum hai

dar-e-pir-e-mughan hai aur main hun

pata manzil ka kuchh milta nahin hai

talash-e-karwan hai aur main hun

kahun ai 'sabr' apna mashghala kya

ye ek urdu zaban hai aur main hun