koi nahin hai kushta-e-be-dil ke aas-pas

koī nahīñ hai kushta-e-be-dil ke ās-pās

phirtī hai be-kasī tire bismil ke ās-pās

rahtī thiiñ pahle hasrateñ jo dil ke ās-pās

dam toḌtī haiñ ab vahī bismil ke ās-pās

lailā ko kuchh payām sunānā hai qais kā

bād-e-sabā hai parda-e-mahmil ke ās-pās

hai hukm-e-yās shādī-e-ummīd ke liye

hargiz phaTakne paa.e na ye dil ke ās-pās

phande lagāte phirte haiñ sayyād baaġh meñ

shāḳhoñ par āshiyān-e-‘anādil ke ās-pās

armānoñ kā hai vasl meñ tāñtā bañdhā huā

kuchh dūr-dūr haiñ abhī kuchh dil ke ās-pās

‘ushshāq qatl ho ga.e sab qatl-gāh meñ

baaqī nahīñ rahā koī qātil ke ās-pās

kyā be-hijāb qais se lailā ho najd meñ

parde paḌe haiñ sharm ke mahmil ke ās-pās

hai yād-e-chashm-e-yār meñ mizhgāñ kī bhī ḳhalish

kuchh ḳhaar bhī haiñ ā.ina-e-dil ke ās-pās

yuuñ mere gird kohkan-o-qais haiñ 'shahīr'

jaise murīd murshid-e-kāmil ke ās-pās

koi nahin hai kushta-e-be-dil ke aas-pas

phirti hai be-kasi tere bismil ke aas-pas

rahti thin pahle hasraten jo dil ke aas-pas

dam toDti hain ab wahi bismil ke aas-pas

laila ko kuchh payam sunana hai qais ka

baad-e-saba hai parda-e-mahmil ke aas-pas

hai hukm-e-yas shadi-e-ummid ke liye

hargiz phaTakne pae na ye dil ke aas-pas

phande lagate phirte hain sayyaad bagh mein

shaKHon par aashiyan-e-‘anadil ke aas-pas

armanon ka hai wasl mein tanta bandha hua

kuchh dur-dur hain abhi kuchh dil ke aas-pas

‘ushshaq qatl ho gae sab qatl-gah mein

baqi nahin raha koi qatil ke aas-pas

kya be-hijab qais se laila ho najd mein

parde paDe hain sharm ke mahmil ke aas-pas

hai yaad-e-chashm-e-yar mein mizhgan ki bhi KHalish

kuchh KHar bhi hain aaina-e-dil ke aas-pas

yun mere gird kohkan-o-qais hain 'shahir'

jaise murid murshid-e-kaamil ke aas-pas