کوئی نقش کاشی و کعبہ نہ تھا

کوئی نقش کاشی و کعبہ نہ تھا

مرے دل میں جب تک عقیدہ نہ تھا

ہر اک گام پر ایک منزل سی تھی

مرے سامنے کوئی رستہ نہ تھا

تصور میں بھی تھی کرن آس کی

اندھیرا مکمل اندھیرا نہ تھا

اسے جب بھی دیکھا تو ایسا لگا

کہ جیسے کبھی اس کو دیکھا نہ تھا

گناہوں کی پاداش بھی زیست تھی

فقط نیکیوں ہی کا ثمرہ نہ تھا

اسے ہر نظر دیکھ پاتی کہاں

تجلی تھی وہ اک تماشا نہ تھا

اسی ضد میں بس وہ پلاتے گئے

کہ پی پی کے جگدیشؔ بہکا نہ تھا