koi nazara na KHud se alahada kije

koī nazāra na ḳhud se alāhada kiije

nazar-nazar meñ haiñ jalve muā.ina kiije

nazar ko pahle jilā de ke ā.īna kiije

phir us ke ba.ad ḳhudī kā mushāhida kiije

ḳhudī ḳhudā se judā ho to be-ḳhudī achchhī

vajūd vahm hai is ko alāhada kiije

nazar se duurī bhī vaj.h-e-huzūrī-e-dil hai

huzūr tajraba achchhā hai tajraba kiije

unhī kā dar hī to hai bazm-e-mumkināt tamām

jabīn-e-shauq ko phir vaqf-e-bārgah kiije

siyāh baḳht ko chamkānā hai agar manzūr

phir apne nāma-e-a.amāl ko siyah kiije

tamām chashm-e-karam aam hai zamāne par

idhar bhī chashm-e-karam apnī gāh-gāh kiije

jo be-talab ho ḳhushī us kā kījiye mātam

kabhī to lazzat-e-ġham ko bhī bā-mazā kiije

'hayāt' tab.a-e-ravānī meñ koī farq nahīñ

chaman tumhārā hai jī bhar ke zamzama kiije

koi nazara na KHud se alahada kije

nazar-nazar mein hain jalwe muaina kije

nazar ko pahle jila de ke aaina kije

phir us ke baad KHudi ka mushahida kije

KHudi KHuda se juda ho to be-KHudi achchhi

wajud wahm hai is ko alahada kije

nazar se duri bhi wajh-e-huzuri-e-dil hai

huzur tajraba achchha hai tajraba kije

unhi ka dar hi to hai bazm-e-mumkinat tamam

jabin-e-shauq ko phir waqf-e-bargah kije

siyah baKHt ko chamkana hai agar manzur

phir apne nama-e-amal ko siyah kije

tamam chashm-e-karam aam hai zamane par

idhar bhi chashm-e-karam apni gah-gah kije

jo be-talab ho KHushi us ka kijiye matam

kabhi to lazzat-e-gham ko bhi ba-maza kije

'hayat' taba-e-rawani mein koi farq nahin

chaman tumhaara hai ji bhar ke zamzama kije