koi nazar na paD sake mujh haal-mast par

koī nazar na paḌ sake mujh hāl-mast par

baiThā huā huuñ is liye pichhlī nishast par

ik mauj-e-ātishīñ rag-o-pai meñ utar ga.ī

rakhā hai us ne juuñ hī kaf-e-dast, dast par

kab raas aa.ī mujh ko mirī fat.h kī ḳhushī

maiñ dil-shikasta ho gayā us kī shikast par

hai yaad mujh ko aaj bhī pahlā mukālima

qaa.im huuñ maiñ to aaj bhī ahd-e-alast par

kaise sambhāl rakkhā hai ik zaat ne use

shashdar huuñ kā.enāt ke kul band-o-bast par

tai marhala kiyā hai adam se vajūd kā

pahuñchā huuñ tab maiñ manzil-e-nā-hast-o-hast par

'sāhir'! maiñ apne-āp se aage nikal gayā

hairat-zada haiñ sab mirī rūhānī jast par

koi nazar na paD sake mujh haal-mast par

baiTha hua hun is liye pichhli nishast par

ek mauj-e-atishin rag-o-pai mein utar gai

rakha hai us ne jun hi kaf-e-dast, dast par

kab ras aai mujh ko meri fath ki KHushi

main dil-shikasta ho gaya us ki shikast par

hai yaad mujh ko aaj bhi pahla mukalima

qaim hun main to aaj bhi ahd-e-alast par

kaise sambhaal rakkha hai ek zat ne use

shashdar hun kaenat ke kul band-o-bast par

tai marhala kiya hai adam se wajud ka

pahuncha hun tab main manzil-e-na-hast-o-hast par

'sahir'! main apne-ap se aage nikal gaya

hairat-zada hain sab meri ruhani jast par