koi nazron se kisi ki jo utar jata hai

koī nazroñ se kisī kī jo utar jaatā hai

us kā shīrāza-e-hastī hī bikhar jaatā hai

bil-yaqīñ yaar kī ik chashm-e-'ināyat ke tufail

'āshiq-e-zār kā paikar hī sañvar jaatā hai

nek-o-bad jo bhī hoñ ā'māl asāsa hai yahī

māsivā is ke na kuchh raḳht-e-safar jaatā hai

itnā āsāñ bhī nahīñ dars-e-mohabbat kā husūl

zer ko thāmo to hāthoñ se zabar jaatā hai

tirī ḳhāmosh-nigāhī bhī fusūñ rakhtī hai

an-kahā lafz bhī siine meñ utar jaatā hai

shaukat-e-'ishq to ḳhāmoshī-e-'ushshāq se hai

aah karne se mohabbat kā asar jaatā hai

'shād' iḳhlās kī daulat ko sañbhāle rakhiye

husn-e-kirdār se insān sañvar jaatā hai

koi nazron se kisi ki jo utar jata hai

us ka shiraaza-e-hasti hi bikhar jata hai

bil-yaqin yar ki ek chashm-e-'inayat ke tufail

'ashiq-e-zar ka paikar hi sanwar jata hai

nek-o-bad jo bhi hon aa'mal asasa hai yahi

masiwa is ke na kuchh raKHt-e-safar jata hai

itna aasan bhi nahin dars-e-mohabbat ka husul

zer ko thamo to hathon se zabar jata hai

teri KHamosh-nigahi bhi fusun rakhti hai

an-kaha lafz bhi sine mein utar jata hai

shaukat-e-'ishq to KHamoshi-e-'ushshaq se hai

aah karne se mohabbat ka asar jata hai

'shad' iKHlas ki daulat ko sanbhaale rakhiye

husn-e-kirdar se insan sanwar jata hai