koi parchhain zer-e-asman rahne nahin dunga

koī parchhā.īñ zer-e-āsmāñ rahne nahīñ dūñgā

kisī ke sar pe koī sā.ebāñ rahne nahīñ dūñgā

maiñ pahle munhadim kar dūñgā har shai har ta'alluq ko

phir us ke baad dhartī pe makāñ rahne nahīñ dūñgā

maiñ ik lā-intihā kī aarzū meñ saarī duniyā ko

asīr-e-ḳhvāhish-e-vahm-o-gumāñ rahne nahīñ dūñgā

maiñ parde chaak kar dūñgā sabhī be-ma.anī rishtoñ ke

kisī ko bhī kisī pe meherbāñ rahne nahīñ dūñgā

ta'alluq gar nahīñ koī to rāh-o-rasm-e-duniyā bhī

maiñ apne aur tumhāre darmiyāñ rahne nahīñ dūñgā

maiñ ''pahle khīñch lūñgā paañv ke nīche se dhartī ko

phir us ke baa'd sar pe āsmāñ rahne nahīñ dūñgā

koi parchhain zer-e-asman rahne nahin dunga

kisi ke sar pe koi saeban rahne nahin dunga

main pahle munhadim kar dunga har shai har ta'alluq ko

phir us ke baad dharti pe makan rahne nahin dunga

main ek la-intiha ki aarzu mein sari duniya ko

asir-e-KHwahish-e-wahm-o-guman rahne nahin dunga

main parde chaak kar dunga sabhi be-mani rishton ke

kisi ko bhi kisi pe meherban rahne nahin dunga

ta'alluq gar nahin koi to rah-o-rasm-e-duniya bhi

main apne aur tumhaare darmiyan rahne nahin dunga

main pahle khinch lunga panw ke niche se dharti ko

phir us ke ba'd sar pe aasman rahne nahin dunga