koi parwah nahin hai ki wo sar kaTenge

koī parvāh nahīñ hai ki vo sar kāTeñge

ham mohabbat se hī nafrat kā asar kāTeñge

azm-e-farhād ne auzār se kaaTā thā pahāḌ

ham rag-e-gul se bhī patthar kā jigar kāTeñge

log ehsān ko ehsān samajhte kab haiñ

jis ke saa.e meñ paleñge vo shajar kāTeñge

phir tire aane kī ummīd-e-sub.h jāgegī

phir tirī yaad meñ ham aaTh pahar kāTeñge

aap ne uḌnā kabhī jis ko sikhāyā 'imrān'

likh rakheñ ye ki vahī aap ke par kāTeñge

koi parwah nahin hai ki wo sar kaTenge

hum mohabbat se hi nafrat ka asar kaTenge

azm-e-farhad ne auzar se kaTa tha pahaD

hum rag-e-gul se bhi patthar ka jigar kaTenge

log ehsan ko ehsan samajhte kab hain

jis ke sae mein palenge wo shajar kaTenge

phir tere aane ki ummid-e-subh jagegi

phir teri yaad mein hum aaTh pahar kaTenge

aap ne uDna kabhi jis ko sikhaya 'imran'

likh rakhen ye ki wahi aap ke par kaTenge