koi ranj hai na shikayaten mujhe apne hosh-e-parida se

koī rañj hai na shikāyateñ mujhe apne hosh-e-parīda se

ye vo sham.a thī jo bhaḌak uThī mirī āh-e-nīm-kashīda se

mirī vahshatoñ kī hai intihā ki kisī kā husn hai rūnumā

kabhī mere dāman-e-chāk se kabhī merī jeb-e-darīda se

maiñ numūd-e-husn-e-alast huuñ maiñ charāġh-e-ishq-ba-dast huuñ

ye tajalliyāt-e-bahār haiñ mire rang-o-bū-e-parīda se

tirī yaad merī aniis hai tirī yaad merī jalīs hai

mirī zindagī kī numūd hai tirī ārzū-e-tapīda se

maiñ haram meñ mahv-e-niyāz thā maiñ butoñ meñ sajda-tarāz thā

kabhī imtiyāz na ho sakā mire zauq-e-hijr-chashīda se

koī ārzū-e-dilī 'sirāj' murād ko na pahuñch sakī

koī phuul baar na pā sakā mirī kisht-e-barq-rasīda se

koi ranj hai na shikayaten mujhe apne hosh-e-parida se

ye wo shama thi jo bhaDak uThi meri aah-e-nim-kashida se

meri wahshaton ki hai intiha ki kisi ka husn hai runuma

kabhi mere daman-e-chaak se kabhi meri jeb-e-darida se

main numud-e-husn-e-alast hun main charagh-e-ishq-ba-dast hun

ye tajalliyat-e-bahaar hain mere rang-o-bu-e-parida se

teri yaad meri anis hai teri yaad meri jalis hai

meri zindagi ki numud hai teri aarzu-e-tapida se

main haram mein mahw-e-niyaz tha main buton mein sajda-taraaz tha

kabhi imtiyaz na ho saka mere zauq-e-hijr-chashida se

koi aarzu-e-dili 'siraj' murad ko na pahunch saki

koi phul bar na pa saka meri kisht-e-barq-rasida se