کوئی رستہ نہیں جاتا خوشی تک

کوئی رستہ نہیں جاتا خوشی تک

بھٹک جاتی یہاں پر زندگی تک

اسی سے دور جانا ہے ہمیں اور

پہنچ جاتے ہیں اکثر ہم اسی تک

ہمیں پھر سے ملے گا وہ کسی دن

یہی ہم سوچتے ہیں آخری تک

اگر ہم شاعری کرتے نہیں تو

کہانی بھی نہیں جاتی کسی تک

خفا رہتی ہے تجھ سے روشنی کیوں

یہی تو پوچھتی ہے تیرگی تک

ہوئے بدنام ہم تو عاشقی میں

کہاں پر ہو سکی یہ عاشقی تک

سمے اچھا نہیں ہے اور سوچو

پڑی ہے بند کب سے یہ گھڑی تک

اسی کارن ہوئے تھے اجنبی ہم

محبت کھا گئی تھی دوستی تک