koi rutba to koi nam-nasab puchhta hai

koī rutba to koī nām-nasab pūchhtā hai

ab jahāñ meñ koī kirdār kā kab pūchhtā hai

tū ne kis darja nibhāyā hai parastish kā nizām

chāhe pūchhe na kabhī koī vo rab pūchhtā hai

chhīn letā hai vo pahle mirī ḳhushiyoñ kī vaj.h

aur phir mujh se mire ġham kā sabab pūchhtā hai

siskiyāñ ghol ke ashkoñ ko nigalne kā hunar

maano mat maano har ik jashn-e-tarab pūchhtā hai

vo javāboñ meñ bhale de na sake koī javāb

par savāloñ pe savālāt ġhazab pūchhtā hai

saarī duniyā kī sunātā hai mujhe mere sivā

aur phir haal mirā chhoḌ ke sab pūchhtā hai

huuñ vo lāchār sitam jis ko duā.eñ DhūñDeñ

huuñ vo bīmār maraz jis ko matab pūchhtā hai

pūchh letā hai dil-o-zehn kī saarī bāteñ

pūchhne vaalī magar baat vo kab pūchhtā hai

pās-e-ġhairat hai na 'nāyāb' anā kā hai lihāz

chal nikaltā huuñ mirā naam vo jab pūchhtā hai

koi rutba to koi nam-nasab puchhta hai

ab jahan mein koi kirdar ka kab puchhta hai

tu ne kis darja nibhaya hai parastish ka nizam

chahe puchhe na kabhi koi wo rab puchhta hai

chhin leta hai wo pahle meri KHushiyon ki wajh

aur phir mujh se mere gham ka sabab puchhta hai

siskiyan ghol ke ashkon ko nigalne ka hunar

mano mat mano har ek jashn-e-tarab puchhta hai

wo jawabon mein bhale de na sake koi jawab

par sawalon pe sawalat ghazab puchhta hai

sari duniya ki sunata hai mujhe mere siwa

aur phir haal mera chhoD ke sab puchhta hai

hun wo lachaar sitam jis ko duaen DhunDen

hun wo bimar maraz jis ko matab puchhta hai

puchh leta hai dil-o-zehn ki sari baaten

puchhne wali magar baat wo kab puchhta hai

pas-e-ghairat hai na 'nayab' ana ka hai lihaz

chal nikalta hun mera nam wo jab puchhta hai