کوئی شکوہ نہ شکایت نہ گلہ رکھا ہے

کوئی شکوہ نہ شکایت نہ گلہ رکھا ہے

تیری محفل میں یہی پاس وفا رکھا ہے

نہ تو دستار ہے سر پر نہ قبا جسم پہ ہے

شیخ جی آپ نے کیا حال بنا رکھا ہے

اب تو آ جائیے یاں مجمع رنداں کے قریب

شام ہی سے در مے خانہ سجا رکھا ہے

منتظر آپ کے سب جام بکف بیٹھے ہیں

آپ کے نام کا اک جام اٹھا رکھا ہے

اس خرابے سے خرابی کا تصور ہے گناہ

پارسائی کا بھرم اس نے سوا رکھا ہے

چکھ بھی لیجے کہ نکل جائے ذرا حسرت مے

دل میں مانا کہ بہت خوف خدا رکھا ہے

لے چلے گا طرف دشت بلا شوق نورد

کیا کہیں درد تہ جام میں کیا رکھا ہے