koi sitara jabin koi mah ru bhi nahin

koī sitāra jabīñ koī maah rū bhī nahīñ

ilāj-e-vahshat-e-dil sāġhar-o-subū bhī nahīñ

kareñ na ahl-e-chaman par vo tabsira jin ko

shu.ūr-e-mausam-o-tam.īz-e-rañg-o-bū bhī nahīñ

nahīñ hai koī ināñ-gīr-e-rāhvār-e-junūñ

libās-e-aql meñ gunjā.ish-e-rafū bhī nahīñ

na jaane kis liye ghar se nikalte Dartā huuñ

agarche shahr meñ koī mirā adū bhī nahīñ

ye kyā ki ruuTh ga.ī mujh se zindagī merī

ki dil meñ dard nahīñ aañkh meñ lahū bhī nahīñ

ye soch le na huā dast-kash sitam se agar

to is ke ba.ad rahegā sakūñ se tū bhī nahīñ

zamāna ḳhud bhī girāñ-gosh ho gayā hai magar

maiñ kyā karūñ ki ḳhushāmad kī mujh ko ḳhū bhī nahīñ

dil-o-nazar haiñ munavvar jamāl se jis ke

kamāl ye hai ki vo mere rū-ba-rū bhī nahīñ

rahā hī kyā mirī kisht-e-hayāt meñ 'at.har'

ab is zamīñ meñ namī bhī nahīñ numū bhī nahīñ

koi sitara jabin koi mah ru bhi nahin

ilaj-e-wahshat-e-dil saghar-o-subu bhi nahin

karen na ahl-e-chaman par wo tabsira jin ko

shuur-e-mausam-o-tamiz-e-rang-o-bu bhi nahin

nahin hai koi inan-gir-e-rahwar-e-junun

libas-e-aql mein gunjaish-e-rafu bhi nahin

na jaane kis liye ghar se nikalte Darta hun

agarche shahr mein koi mera adu bhi nahin

ye kya ki ruTh gai mujh se zindagi meri

ki dil mein dard nahin aankh mein lahu bhi nahin

ye soch le na hua dast-kash sitam se agar

to is ke baad rahega sakun se tu bhi nahin

zamana KHud bhi giran-gosh ho gaya hai magar

main kya karun ki KHushamad ki mujh ko KHu bhi nahin

dil-o-nazar hain munawwar jamal se jis ke

kamal ye hai ki wo mere ru-ba-ru bhi nahin

raha hi kya meri kisht-e-hayat mein 'athar'

ab is zamin mein nami bhi nahin numu bhi nahin