koi sune na sune arz-e-haal karta ja

koī sune na sune arz-e-hāl kartā jā

na ruk javāb kī ḳhātir savāl kartā jā

samundaroñ ko havā meñ uchhāl de ik baar

tū bā-hunar hai to ye bhī kamāl kartā jā

badal de hijr kī saa.at ko vasl lamhoñ meñ

banā ke kaam ko āsāñ muhāl kartā jā

tū be-misāl agar hai to mujh meñ zāhir ho

mujhe bhī apnī tarah be-misāl kartā jā

qarīb aa ki ujāloñ ke haar pahnā duuñ

mujhe asīr-e-shab-e-lā-zavāl kartā jā

shikast o fat.h nasīboñ se hai vale ai dil

mile haiñ zaḳhm to ḳhud indimāl kartā jā

yahīñ kahīñ tirā maazī bhī saañs letā hai

guzarne vaale bas itnā ḳhayāl kartā jā

tirā hunar tirī dānā.ī bad-duā hai 'imām'

zavāl terā muqaddar kamāl kartā jā

suḳhan-navāz mire nukta-chīñ mire nāqid

mujhe shikār-e-itāb-o-jalāl kartā jā

bahut se tiir haiñ terī kamāñ meñ qaid ab bhī

mire lahū se qabā apnī laal kartā jā

mire zavāl pe kar sabt āḳhirī tahrīr

ye kār-e-nek bhī ai lā-zavāl kartā jā

koi sune na sune arz-e-haal karta ja

na ruk jawab ki KHatir sawal karta ja

samundaron ko hawa mein uchhaal de ek bar

tu ba-hunar hai to ye bhi kamal karta ja

badal de hijr ki saat ko wasl lamhon mein

bana ke kaam ko aasan muhaal karta ja

tu be-misal agar hai to mujh mein zahir ho

mujhe bhi apni tarah be-misal karta ja

qarib aa ki ujalon ke haar pahna dun

mujhe asir-e-shab-e-la-zawal karta ja

shikast o fath nasibon se hai wale ai dil

mile hain zaKHm to KHud indimal karta ja

yahin kahin tera mazi bhi sans leta hai

guzarne wale bas itna KHayal karta ja

tera hunar teri danai bad-dua hai 'imam'

zawal tera muqaddar kamal karta ja

suKHan-nawaz mere nukta-chin mere naqid

mujhe shikar-e-itab-o-jalal karta ja

bahut se tir hain teri kaman mein qaid ab bhi

mere lahu se qaba apni lal karta ja

mere zawal pe kar sabt aaKHiri tahrir

ye kar-e-nek bhi ai la-zawal karta ja