koi surat koi tadbir nikali jae

koī sūrat koī tadbīr nikālī jaa.e

aabrū ishq-o-mohabbat kī bachā lī jaa.e

kaun detā hai vafāoñ kā vafāoñ se javāb

ab to behtar hai ki ye rasm uThā lī jaa.e

fī-zamāna hai yahī maslahat-e-aql-o-shu.ūr

dil meñ ḳhvāhish koī ubhre to dabā lī jaa.e

sāmne bachchoñ ke doharāo na pichhle jhagḌe

nanhe zehnoñ meñ ye buniyād na Daalī jaa.e

mashvara merā bas itnā hai na.ī nasloñ ko

apne ajdād kī pagḌī na uchhālī jaa.e

mere allāh mujhe itnā tavangar kar de

dar se mere kabhī ḳhālī na savālī jaa.e

koī miltā hī nahīñ vāqif-e-ādāb-e-junūñ

ab to bastī hī alag apnī basā lī jaa.e

us taraf vo to idhar ham haiñ pareshāñ 'bebāk'

ḳhvāhish-e-dīd kisī taur na Taalī jaa.e

koi surat koi tadbir nikali jae

aabru ishq-o-mohabbat ki bacha li jae

kaun deta hai wafaon ka wafaon se jawab

ab to behtar hai ki ye rasm uTha li jae

fi-zamana hai yahi maslahat-e-aql-o-shuur

dil mein KHwahish koi ubhre to daba li jae

samne bachchon ke doharao na pichhle jhagDe

nanhe zehnon mein ye buniyaad na Dali jae

mashwara mera bas itna hai nai naslon ko

apne ajdad ki pagDi na uchhaali jae

mere allah mujhe itna tawangar kar de

dar se mere kabhi KHali na sawali jae

koi milta hi nahin waqif-e-adab-e-junun

ab to basti hi alag apni basa li jae

us taraf wo to idhar hum hain pareshan 'bebak'

KHwahish-e-did kisi taur na Tali jae