koi tara na dikha sham ki virani mein

koī taara na dikhā shaam kī vīrānī meñ

yaad aa.egā bahut be-sar-o-sāmānī meñ

dam-ba-ḳhud rah gayā vo pursish-e-hālāt ke baa'd

aa.ina ho ga.ī maiñ ālam-e-hairānī meñ

dil salāmat rahe tūfāñ se tasādum meñ magar

haath se chhūT gayā haath pareshānī meñ

sahl kartī maiñ taḳhātub meñ mukarnā tujh se

mushkileñ aur thiiñ is raah kī āsānī meñ

ab tirī yaad jo aa.e bhī to yuuñ aatī hai

jaise kāġhaz kī koī naav chale paanī meñ

aise 'ālam meñ mirī niiñd kā aaseb na pūchh

ḳhvāb māñge haiñ tirī chashm kī nigarānī meñ

khīñch rakhtī hai mire paañv ko dahlīz talak

koī zanjīr hai is ghar kī nigahbānī meñ

koi tara na dikha sham ki virani mein

yaad aaega bahut be-sar-o-samani mein

dam-ba-KHud rah gaya wo pursish-e-haalat ke ba'd

aaina ho gai main aalam-e-hairani mein

dil salamat rahe tufan se tasadum mein magar

hath se chhuT gaya hath pareshani mein

sahl karti main taKHatub mein mukarna tujh se

mushkilen aur thin is rah ki aasani mein

ab teri yaad jo aae bhi to yun aati hai

jaise kaghaz ki koi naw chale pani mein

aise 'alam mein meri nind ka aaseb na puchh

KHwab mange hain teri chashm ki nigarani mein

khinch rakhti hai mere panw ko dahliz talak

koi zanjir hai is ghar ki nigahbani mein