کوئی تازہ غزل سنی ہے ابھی

کوئی تازہ غزل سنی ہے ابھی

دل میں اک ٹیس سی اٹھی ہے ابھی

تیز بارش میں نیک بندوں کی

کوئی دیوار تھی گری ہے ابھی

اس طرح ہے اداس میری گلی

جیسے بیوہ کوئی ہوئی ہے ابھی

صرف میرا ہی گھر تھا بوسیدہ

برق اس پر ہی بس گری ہے ابھی

بعد کی کچھ خبر نہیں ہمدم

زندگی مجھ کو ڈھونڈھتی ہے ابھی

ٹھنڈا جھونکا ہوا کا آیا ہے

کیا صبا مجھ کو ڈھونڈھتی ہے ابھی

وقت اچھا کبھی نہ آئے گا

رہزنی راہ میں کھڑی ہے ابھی

موت آنکھیں بچھائے بیٹھی ہے

زندگی مجھ سے کہہ گئی ہے ابھی

میری منزل تو آئے گی راہیؔ

جستجو میں شگفتگی ہے ابھی