koi taza ghazal suni hai abhi

koī taaza ġhazal sunī hai abhī

dil meñ ik Tiis sī uThī hai abhī

tez bārish meñ nek bandoñ kī

koī dīvār thī girī hai abhī

is tarah hai udaas merī galī

jaise beva koī huī hai abhī

sirf merā hī ghar thā bosīda

barq is par hī bas girī hai abhī

baad kī kuchh ḳhabar nahīñ hamdam

zindagī mujh ko DhūñDhtī hai abhī

ThanDā jhoñkā havā kā aaya hai

kyā sabā mujh ko DhūñDhtī hai abhī

vaqt achchhā kabhī na aa.egā

rahzanī raah meñ khaḌī hai abhī

maut āñkheñ bichhā.e baiThī hai

zindagī mujh se kah ga.ī hai abhī

merī manzil to aa.egī 'rāhī'

justujū meñ shaguftagī hai abhī

koi taza ghazal suni hai abhi

dil mein ek Tis si uThi hai abhi

tez barish mein nek bandon ki

koi diwar thi giri hai abhi

is tarah hai udas meri gali

jaise bewa koi hui hai abhi

sirf mera hi ghar tha bosida

barq is par hi bas giri hai abhi

baad ki kuchh KHabar nahin hamdam

zindagi mujh ko DhunDhti hai abhi

ThanDa jhonka hawa ka aaya hai

kya saba mujh ko DhunDhti hai abhi

waqt achchha kabhi na aaega

rahzani rah mein khaDi hai abhi

maut aankhen bichhae baiThi hai

zindagi mujh se kah gai hai abhi

meri manzil to aaegi 'rahi'

justuju mein shaguftagi hai abhi