کوئی تتلی نہیں بتاتی ہے

کوئی تتلی نہیں بتاتی ہے

تیری خوشبو کہاں سے آتی ہے

کیا ہوا دھوپ اگر ستاتی ہے

چاندنی بھی یہی بناتی ہے

ایک بیمار آرزو دل میں

روز بن ٹھن کے بیٹھ جاتی ہے

یہ محبت کا مے کدہ ہے یہاں

پیاس ہی پیاس کو بجھاتی ہے

اب نہیں چونکتا ہوں میں گھر میں

سارے پردے ہوا ہلاتی ہے

میرے کمرے میں اب بجائے میرے

تیری تصویر مسکراتی ہے

شکوۂ ہجر پر وہ یہ بولے

عید روزوں کے بعد آتی ہے

ضبط سے پیٹ جب نہیں بھرتا

تو غریبی اصول کھاتی ہے

اس مکاں کا چراغ ہوں فہمیؔ

جس کی جھاڑو ہوا لگاتی ہے