koi to baat hai yarab hawa-e-ku-e-jaanan mein

koī to baat hai yārab havā-e-kū-e-jānāñ meñ

asīroñ ko zarā taskīn ho jaatī hai zindāñ meñ

yahāñ kī ḳhaak ḳhūn-e-be-gunah kā rang laatī hai

zarā dāman bachā kar aa.iye gor-e-ġharībāñ meñ

ye qad buuTā sā gul se gaal āñkheñ nargis-e-shahlā

javānī tum pe kyā aa.ī bahār aa.ī gulistāñ meñ

zamāne kī do-rañgī dekh kar jaltā hai jī kaisā

ki shabnam ro rahī hai phuul hañste haiñ gulistāñ meñ

jo dekho ġhaur se to chaar din kī zindagī kyā hai

faqat haiñ chand sāñseñ aur kyā rakhā hai insāñ meñ

na rotā hai kisī ke haal par koī na hañstā hai

baḌe ārām se sote haiñ sab gor-e-ġharībāñ meñ

sitam-ījād kis kis ko tire darbāñ jagā.eñge

mirī taqdīr bhī sotī hai mere saath zindāñ meñ

kareñge sajde jhuk jhuk kar butoñ ke pūjne vaale

sanam-ḳhāne kā lutf āye.gā 'safdar' mere dīvāñ meñ

koi to baat hai yarab hawa-e-ku-e-jaanan mein

asiron ko zara taskin ho jati hai zindan mein

yahan ki KHak KHun-e-be-gunah ka rang lati hai

zara daman bacha kar aaiye gor-e-ghariban mein

ye qad buTa sa gul se gal aankhen nargis-e-shahla

jawani tum pe kya aai bahaar aai gulistan mein

zamane ki do-rangi dekh kar jalta hai ji kaisa

ki shabnam ro rahi hai phul hanste hain gulistan mein

jo dekho ghaur se to chaar din ki zindagi kya hai

faqat hain chand sansen aur kya rakha hai insan mein

na rota hai kisi ke haal par koi na hansta hai

baDe aaram se sote hain sab gor-e-ghariban mein

sitam-ijad kis kis ko tere darban jagaenge

meri taqdir bhi soti hai mere sath zindan mein

karenge sajde jhuk jhuk kar buton ke pujne wale

sanam-KHane ka lutf aayega 'safdar' mere diwan mein