koi to hai jo andheron mein bhi ujala hai

koī to hai jo añdheroñ meñ bhī ujālā hai

safar hayāt kā āsān karne vaalā hai

lahaktī shāḳh pe qaa.em hai āshiyāñ merā

sabā ne god meñ apnī mujhe sañbhālā hai

kiyā savāl to dil ne hameñ yuuñ bahlāyā

zarā sī der meñ mausam badalne vaalā hai

kareñ bhī zikr-e-vafā kis liye zamāne meñ

ye mudda'ā hī nahīñ kyoñ ise uchhālā hai

'atā hue haiñ hameñ ashk jo zamāne se

mire laboñ ne tabassum meñ un ko Dhālā hai

vo muddatoñ se nahīñ hai mirī nigāhoñ meñ

na jaane dil ne use kyoñ nahīñ nikālā hai

koi to hai jo andheron mein bhi ujala hai

safar hayat ka aasan karne wala hai

lahakti shaKH pe qaem hai aashiyan mera

saba ne god mein apni mujhe sanbhaala hai

kiya sawal to dil ne hamein yun bahlaya

zara si der mein mausam badalne wala hai

karen bhi zikr-e-wafa kis liye zamane mein

ye mudda'a hi nahin kyon ise uchhaala hai

'ata hue hain hamein ashk jo zamane se

mere labon ne tabassum mein un ko Dhaala hai

wo muddaton se nahin hai meri nigahon mein

na jaane dil ne use kyon nahin nikala hai