کوئی تو ہے جو کہیں مجھ کو یاد کرتا ہے

کوئی تو ہے جو کہیں مجھ کو یاد کرتا ہے

جو یہ نہیں ہے تو کیوں دل مرا دھڑکتا ہے

کسی بھی آنکھ نے دیکھا نہیں جسے اب تک

اسی چراغ سے سب کا چراغ جلتا ہے

بہت دنوں میں وہ بام جمال پر آیا

بہت دنوں میں کھلا چاند کیوں چمکتا ہے

تمام رات تعاقب کسی کا کرتے ہوئے

مرا خیال بہت دور جا نکلتا ہے

جسے کبھی مرے بچپن نے کھیل ڈالا تھا

وہی پرندہ ہر اک شاخ پر چہکتا ہے

پلٹ کے دیکھوں تو آتا نہیں نظر کوئی

نہ جانے کون مرے ساتھ ساتھ چلتا ہے

ہر ایک شام نظارے نئے نمود کریں

ہر ایک شام فلک پیرہن بدلتا ہے

میں اپنے ذہن سے اکثر سوال کرتا ہوں

یہ کون زیست کے خاکے میں رنگ بھرتا ہے

اگرچہ نورؔ ابھی دیوار جاں میں خم بھی نہیں

زیاں کے خوف سے مجھ میں کوئی سسکتا ہے