koi to hai jo kahin mujhko yaad karta hai

koī to hai jo kahīñ mujh ko yaad kartā hai

jo ye nahīñ hai to kyoñ dil mirā dhaḌaktā hai

kisī bhī aañkh ne dekhā nahīñ jise ab tak

usī charāġh se sab kā charāġh jaltā hai

bahut dinoñ meñ vo bām-e-jamāl par aaya

bahut dinoñ meñ khulā chāñd kyoñ chamaktā hai

tamām raat ta.āqub kisī kā karte hue

mirā ḳhayāl bahut duur jā nikaltā hai

jise kabhī mire bachpan ne khel Daalā thā

vahī parinda har ik shāḳh par chahaktā hai

palaT ke dekhūñ to aatā nahīñ nazar koī

na jaane kaun mire saath saath chaltā hai

har ek shaam nazāre na.e numūd kareñ

har ek shaam falak pairahan badaltā hai

maiñ apne zehn se aksar savāl kartā huuñ

ye kaun ziist ke ḳhāke meñ rang bhartā hai

agarche 'nūr' abhī dīvār-e-jāñ meñ ḳham bhī nahīñ

ziyāñ ke ḳhauf se mujh meñ koī sisaktā hai

koi to hai jo kahin mujh ko yaad karta hai

jo ye nahin hai to kyon dil mera dhaDakta hai

kisi bhi aankh ne dekha nahin jise ab tak

usi charagh se sab ka charagh jalta hai

bahut dinon mein wo baam-e-jamal par aaya

bahut dinon mein khula chand kyon chamakta hai

tamam raat taaqub kisi ka karte hue

mera KHayal bahut dur ja nikalta hai

jise kabhi mere bachpan ne khel Dala tha

wahi parinda har ek shaKH par chahakta hai

palaT ke dekhun to aata nahin nazar koi

na jaane kaun mere sath sath chalta hai

har ek sham nazare nae numud karen

har ek sham falak pairahan badalta hai

main apne zehn se aksar sawal karta hun

ye kaun zist ke KHake mein rang bharta hai

agarche 'nur' abhi diwar-e-jaan mein KHam bhi nahin

ziyan ke KHauf se mujh mein koi sisakta hai