koi to ho jo usko rokne ka moajiza kare

koī to ho jo us ko rokne kā mo.ajiza kare

yā ho rahā hai jo vo koī ḳhvāb ho ḳhudā kare

kuchh āstīn tang thī to saañp ghuT ke mar ga.e

ḳhudā aziiz dostoñ ko maġhfirat atā kare

mujhe to ishq ke liye duā bhī nāgavār hai

diloñ ke biich kyoñ koī bhī aur fāsla kare

sunā hai us kī tīrgī pe note vārte haiñ log

hameñ bhī raushnī kā kuchh muāvza milā kare

kabhī mirī qasam hī khā ke mujh ko kuchh yaqīñ dilā

mujhe bhī merī zindagī kī ahmiyat lagā kare

pata chalā hai un kī kuhniyoñ meñ dard aa gayā

hamāre vāste duā meñ haath jo uThā kare

badan kī bhuuk kitnī baar ishq ko nigal ga.ī

magar havas kī aag kā jalā kahāñ bujhā kare

koi to ho jo us ko rokne ka moajiza kare

ya ho raha hai jo wo koi KHwab ho KHuda kare

kuchh aastin tang thi to sanp ghuT ke mar gae

KHuda aziz doston ko maghfirat ata kare

mujhe to ishq ke liye dua bhi nagawar hai

dilon ke bich kyon koi bhi aur fasla kare

suna hai us ki tirgi pe note warte hain log

hamein bhi raushni ka kuchh muawza mila kare

kabhi meri qasam hi kha ke mujh ko kuchh yaqin dila

mujhe bhi meri zindagi ki ahmiyat laga kare

pata chala hai un ki kuhniyon mein dard aa gaya

hamare waste dua mein hath jo uTha kare

badan ki bhuk kitni bar ishq ko nigal gai

magar hawas ki aag ka jala kahan bujha kare