koi to is ka ahl ho ye jam kis ko den

koī to is kā ahl ho ye jaam kis ko deñ

do ghūñT bach ga.ī thī jo kal shaam kis ko deñ

is apnī dauḌ-dhūp kā ilzām kis ko deñ

tujh ko na deñ to gardish-e-ayyām kis ko deñ

hamvār rāh-e-zīst ko karnā to hai zarūr

ham se nipaT na paa.e to ye kaam kis ko deñ

sab ne ghar apne māl-e-ġhanīmat se bhar liye

sab mustahiq haiñ is ke to in.aam kis ko deñ

barbādī-e-chaman meñ hamārā bhī haath hai

mushkil ye aa paḌī hai ki ilzām kis ko deñ

tujh ko ḳhudā samajh ke kahā thā ḳhudā magar

ab hai bhalā sā ye jo tirā naam kis ko deñ

sab hī hamāre yaar haiñ bhaa.ī haiñ yā aziiz

ārām kis kā chhīn leñ ārām kis ko deñ

'rāhat' tamām log bhale ho ga.e udhar

lab pe jo aa chukī hai vo dushnām kis ko deñ

koi to is ka ahl ho ye jam kis ko den

do ghunT bach gai thi jo kal sham kis ko den

is apni dauD-dhup ka ilzam kis ko den

tujh ko na den to gardish-e-ayyam kis ko den

hamwar rah-e-zist ko karna to hai zarur

hum se nipaT na pae to ye kaam kis ko den

sab ne ghar apne mal-e-ghanimat se bhar liye

sab mustahiq hain is ke to inam kis ko den

barbaadi-e-chaman mein hamara bhi hath hai

mushkil ye aa paDi hai ki ilzam kis ko den

tujh ko KHuda samajh ke kaha tha KHuda magar

ab hai bhala sa ye jo tera nam kis ko den

sab hi hamare yar hain bhai hain ya aziz

aaram kis ka chhin len aaram kis ko den

'rahat' tamam log bhale ho gae udhar

lab pe jo aa chuki hai wo dushnam kis ko den