koi to lafz sujhe tujhe jo ayan kare

koī to lafz sūjhe tujhe jo ayaañ kare

koī to kaifiyat mujhe puurā bayāñ kare

koī to tere husn ke laa.iq ho aa.ina

koī to jāñch kar tujhe sadr-e-jahāñ kare

koī mile to merī shab-e-ġham kī ho sahar

koī to nūr-e-vasl se phir sub.h yaañ kare

koī mile to jannat-e-gum-gashta pā.ūñ maiñ

koī to merā naam bhī vird-e-zabāñ kare

koī to mere qalb pe vārid ho misl-e-lauh

koī to ḳhatm dil meñ utar kar ḳhizāñ kare

koī to aa.e bād-e-bahārī ke sañg sañg

koī to merā qarya-e-dil gul-fishāñ kare

koī nigār-e-ġham meñ bane merā ham-rikāb

koī shikasta dard kā koh-e-girāñ kare

koī to chīḳh ho jo mirā dard kah sake

koī to pesh khol ke soz-e-nihāñ kare

koi to lafz sujhe tujhe jo ayan kare

koi to kaifiyat mujhe pura bayan kare

koi to tere husn ke laiq ho aaina

koi to jaanch kar tujhe sadr-e-jahan kare

koi mile to meri shab-e-gham ki ho sahar

koi to nur-e-wasl se phir subh yan kare

koi mile to jannat-e-gum-gashta paun main

koi to mera nam bhi wird-e-zaban kare

koi to mere qalb pe warid ho misl-e-lauh

koi to KHatm dil mein utar kar KHizan kare

koi to aae baad-e-bahaari ke sang sang

koi to mera qarya-e-dil gul-fishan kare

koi nigar-e-gham mein bane mera ham-rikab

koi shikasta dard ka koh-e-giran kare

koi to chiKH ho jo mera dard kah sake

koi to pesh khol ke soz-e-nihan kare